Na primeira metade do século XX xorden en Galicia unha serie de acontecementos que
debuxan unha nova situación, na que se aprecia un compromiso por parte de moitas persoas
que preparan o camiño para o chamado Rexurdimento. Esta época é coñecida coma a dos
Precursores.
Feitos históricos importantes
contribúen a espertar a conciencia de moitos galegos. Un deles foi a invasión francesa,
que dará lugar a que circulen textos de axitación popular na lingua do país. A
conciencia dunha Galicia diferenciada do resto de España irá aumentando progresivamente
e esta procura de identidade maniféstase en publicacións nas que os escritores e
políticos valoraban o propio fronte á agresión externa.
En 1848 ten lugar o banquete de
Conxo no que confraternizaron estudiantes e traballadores, e no que o galeguismo toma
características revolucionarias. Reivindícase o dereito de Galicia a administrar os seus
propios recursos, e participaron homes que habían ter un gran protagonismo no proceso
galeguizador, como Aurelio Aguirre ou o propio Eduardo Pondal.
Coa publicación en 1853 do
primeiro libro escrito en lingua galega no século XIX, A gaita galega, dáse un
paso moi importante cara á normalización literaria. O seu autor foi Xoán Manuel Pintos,
que xunto con Francisco Añón, Manuel Murguía e outros, pertence ó grupo chamado dos
Precursores, por esta faceta de anticiparse ó que logo sería o pleno rexurdir da cultura
galega.
Pero o Rexurdimento pleno vai
chegar coa publicación de Cantares Gallegos de
Rosalía de Castro, en 1863, obra que supuxo a maioría de
idade do novo rexurdir da cultura galega. Outros escritores destacados son Curros
Enríquez ( Aires da miña terra, 1880 ) e Eduardo Pondal ( Queixumes dos pinos,
1886 ), que lle deron ó galego a plenitude literaria que perdera séculos atrás. |