Existen palabras que aparentemente
parecen sinónimas pero que non o son, xa que aínda que están próximas
semanticamente, moi poucas veces son intercambiables e teñen matices difrenciadores moi
claros, polo que é necesario facer algunhas precisións léxicas sobre elas.
En primeiro lugar explicaremos a
diferencia en tre CHAN e SOLO.
Chan é a superficie do terreo que pisamos, a que
se pisa nunha casa ou noutro tipo de construcción, e así diremos: recolle os
papeis que tiraches no chan ; ten coidado, acaban de vernizar o
chan.
Solo ten un significado moito máis técnico e
refírese á parte da cortiza terrestre composta por elementos minerais e orgánicos onde
se cultivan as plantas, onde se edifica etc. , falando entón ,por exemplo, de solo
urbanizable, Lei do solo etc,
Veremos tamén a diferencia entre LUME
e FOGO.
Lume ten un significado moi amplo, podendo
aplicarse a todo aquilo que arde, escoitando expresións como: está preso porque
prendeu lume ó monte ; o lume novo dá boa sorte, referíndonos ó Lume
do San Xoán.
Fogo ten un significado moito máis restrinxido,
referíndose a conceptos nos que a idea de combustión presenta menos evidencia . Os tres
usos máis claros desta palabra son para falar de: armas de fogo ; fogos de artificio; e a voz de mando que se usa para disparar , e por
extensión deste último uso falamos tamén de alto ó fogo no caso dos conflictos bélicos.
E xa por último comentaremos as
diferencias entre CONCELLO e AXUNTAMENTO, termos que
tanto se confunden e que teñen tan pouco en común.
Concello pode referirse á corporación municipal,
ó término ou xurisdición municipal. A Casa do Concello é onde están as
oficinas administrativas, o despacho do alcalde e o salón onde se celebran os plenos.
Axuntamento só significa acción ou efecto de
xuntar, reunión , cópula etc., debendo polo tanto desbotar o uso de esta palabra para
referirnos ó indicado anteriormente como Concello.